كتبت الإعلامية ميرفت كجك على صفحتها على الفيس بووك ؛

في دولة الفلتان الأمني وبرسم بلدية أنصار وكل المعنيين وقوى الأمن الداخلي 
أقدم أحد عناصر قوى الأمن وهو مرافق ضابط ويدعى ط ح ق من بلدة أنصار على ضرب شاب قاصر يبلغ من العمر ١٦ سنة في محل للكمبيوتر في أنصار وصفعه أمام جميع الحضور بدون سبب جوهري وإنما بالتسلط والزعرنة والهيمنة مستندا على رتبته العسكرية بدون رحمة ولا أخلاق ولاضمير

وعندما حضرت والدة الشاب لسؤاله سبب أقدامه على ضرب ابنها وجه اليها كلمات نابية بأعلى صوته ولم يحترم سنها لا وبل قال لها حرفيا انا ضربته واسمي (…) روحي تشكي عليي 
وبلطي البحر 

ودعت كجك بلدية أنصار إلى القصاص منه وإغلاق كل محلات الكمبيوتر التي لا تؤدي الا إلى قلة الأدب والتربية والأخلاق وتخرب بيوت الناس ومستقبل الشباب وتجمعهم على التدخين والأراكيل والحشيش والأفلام والمشاكل وتولد جيلا فاسدا بكل معنى الكلمة
كذلك دعت مديرية قوى الأمن الداخلي وبالأخص وزيرة الداخلية والبلديات السيدة ريا الحسن إلى إصدار قرار سريع بمحاسبة هذا الشاب وكل من يقوم بأفعاله مع المواطنين وخاصة مع من هم دون سن ١٨ سنة والعمل على إغلاق كل محلات الكمبيوتر والكافيه في كافة المناطق اللبنانية لسبب جوهري هو الحفاظ على شبابنا وأولادنا بعيدا عن الزعرنات وفساد المتواجدون بهكذا أماكن

وتمنت على الأهالي ان يمنعوا اولادهم من ارتياد هذه الأماكن للحفاظ عليهم وعدم وقوفهم ووقوفكم معهم بمواقف سيئة بسبب بعض الفاسدين وقليلي التربية .

وتوجهت كجك برسالة الى المعنيين تناشد بالإقتصاص من المعتدي على إبنها القاصر :

ريا الحسن معالي وزيرة الداخلية

مديرية قوى الأمن الداخلي

بلدية أنصار

بلدية الصرفند

وزارة الإعلام

طوني خليفة

برسم كل المعنيين وكل المتابعين

صرخة أم موجوعة لمعالي الوزيرة ريا الحسن وزيرة الداخلية ولكل المعنيين وأصحاب الضمائر 
(بدنا حقنا أنا وإبني ) وبدنا الإسراع في التحقيق
وتوقيف ” المجرم ط.ح ق” دركي من بلدة أنصار شوفير النقيب خ من بلدة الصرفند

هيدا إبني يلي ما عندي غيره ربيته كل شبر بنذر 
هيدا إبني يلي طبق آل ١٦ سنة الشهر الماضي 
هيدا إبني يلي بنام وبقوم وبحلم كيف بدو يتخرج ويعمل حكيم أسنان 
هيدا ابني ابن البيت يلي انضرب وما ضرب وما رد التعدي عالمعتدي مع انو كانوا رفقاته كتار واكتفى بالاتصال فيي لإتصرف وأخده عند الطبيب والقانون ياخد مجراه ويحاسبه

وأنا بدوري واجهت المعتدي بكل الاحترام مع انو رده كان قلة احترام وقلة تربية وبكامل الزعرنة والإجرام

كل شي كنت أتوقع الا إبني ينضرب ويخسر سمعه بدينته بالسلبطة والفساد وقلة التربية من دركي وحش عمره ٢٧ سنة

كل شي توقعت الا المجرم بعده عم يمارس حياته الطبيعية ويكزدر بيناتنا وأنا عم اركض بإبني من مستشفى لمستشفى ومن حكيم لحكيم وابني يتحمل وجع مش دينته بس وجع بلدنا وفساده وبلدنا وحكامه يلي بيوظفوا هيك زعران وبيقووهم عالشعب وعالمواطنين وبيعملوا رجال عالاطفال والعزل وبيخسروهم حواسهم وصحتهم وبيدعموهم لما يغلطوا وحدا يتشكى عليهم ليحموهم بدون ما يحاسبوهم .

لأم المجرم الازعر ط. ح ق بقول تفو عا هيك تربية انشالله بتخسريه ومن أزعر متل ابنك لتعرفي شو ربيتي وابنك شو عم يعمل بأولاد العالم عم ادعي عليكم ليل نهار وبكل صلاة .

ولدولتنا بقول ولكل يلي تبنوا الموضوع وعم يحققوا فيه بقول شكرا لتعاونكم وبطالب بتحقيق سريع وتوقيف عاجل لهالمجرم بأسرع وقت ممكن وحقنا بدنا ياه وإلا رح ناخذه بإيدنا

هو تعدى ولازم ياخد جزائه وبحمله كامل المسؤولية لكل شي صار مع ابني ولكل شي ممكن يصير بالمستقبل 
التحقيق السريع والتوقيف والمحاسبة هني مطلبنا وما رح ننطر كتير إذا ما لقينا نتيجة ما رح نسكت ورح نروح بإتجاهات تانية .

أولادي خط أحمر وظفر إبني بالدنيا