رولاند بدور ابن الـ 19 عاماً يصارع الموت بعد إصابته بطلق ناري عن طريق الخطأ في الحمرا..."ينتقل من الجبل إلى بيروت لكي يؤمن لقمة عيشه"

هذا ما كتبه خال #رولاند_بدور الذي اصيب امس باطلاق نار في #الحمرا:

بدي خبركون قصة صغيرة عن هيدا الشاب إلي موجود بالصُور ...!
هيدا الشاب اسمه رولاند بدّور .
هيدا الشاب هلق صار عمره بس ١٩ سنة .
هيدا الشاب هوا رجّال من صغره (قدا و قدود) .
هيدا الشاب ما بيتعّدى عحدا ولا بخلي حدا يتعدى عليه.. منيح كتير وكل العالم بتعرفه وبتحبه.
هيدا الشاب بينزل من الجبل عبيروت (العاصمة) ليشتغل ليأمن مصروفه و يكفي علمه
هيدا الشاب في أمرار يوصل الليل مع النهار ليأمن لقمة عيشه ألو و لأمه و أخته ..
هيدا الشاب مبارحة عشية بمنطقة الحمرا واقف هوي وصاحب الأوتيل أو المطعم إلي بيشتغل في (عالمدخل) بيمرقوا شخصين أجانب عم يختلفوا مع بعض بنص الطريق و بهاي اللحظة بيمرق شخص راكب على موتو او موتسيك إلي هوي .. و بيطلق النار عليهم و بصيب هيدا الشاب بخصرته و بفخذه !!!!..
هيدا الشاب شو ذنبوووووه!
هيدا الشاب بكون (إبن أختي )حبيب قلب وروح خاله...
هيدا الشاب أمانة برقبتي ليوم الدين ...
هيدا الشاب هلق هوي بالعناية الفائقة عملوا له كم عملية بس ليوقف النزيف و الحمدالله وضعه مستقر لهاي اللحظة اليوم رح يشوفوا وضعه اذا بيسمح يكفولوا العمليات ...!
الله يشفيك يا حبيبي و ترجعلنا بخير وسلامة و شكراً كتير لكل شخص اتصل فينا ليطمن عليه و لكل حدا ساعد هيدا الشاب ولكل شباب و صبايا ضيعتي و أصحابه لرولاند ..
وآخر شي عذراً عالإطالة عليكم بدي قول لدولتي الفاسدة و لكل المسؤولين بلبنان لأي متى رح تضلكم مستهترين و مستهزئين بالشعب ، أي متى بدكن تتحملوا مسؤولياتكم، لأي متى بدوا يضل السلاح المتفلت بأيادي العالم الزعران، يا مجرمين يا سفاحين ، أي متى بدنا نحس انو عنا بلد لنرجع نعيش فيه، لأي متى بدنا نضلنا بعاد عن أهلنا و أحبائنا و بلدنا.
لعنة الله عليكم جميعاً !!! ...