كان عيد"
- [ ] لما كنا نلعب ألعاب زغار بالمرجوحة والشقليبة والزحليطة وزيزي أني والدويخة ..كان عيد،
- [ ] لما كنا نلبس اواعي العيد وناخد العيدية ولما إمنا تكون مدهدكة بشغل البيت ومهموكة بتحضير دجاجة العيد المحشية وابتسامتها منورة الدني ولما كان بيّنا ياخدنا عند كل القرايب نعيّد عليهن ونحنا نكون مبسوطين بقبض العيديات..كان عيد، لما كنا نفوت عالسينما نحضر كل الأفلام ولما يمرق مشهد في بوسة نخجل وتحمر خدودنا ونغمض عيوننا ولما البطل يموت نحزن ونزعل.. كان عيد ، ولما نشتري ترمس وفول نابت مع الحامض المشحم وذرة مشوي ونتغدى فلافل ونشرب كازوز ونقرقش حبة بوظة ع تلج ونروح مشوار ع قبر بنت الملك.. كان عيد،
لما كنا نطلع ع التلة ونتدركب من فوق لتحت، ونلعب تقوسي ولقيطة وغميضة وبنانير عالجورة طس وحدفة وبملعب الوعر نلعب بالطابة المنفسة ونلبج بعض ونعمر بالرمل البيوت ع شط البحر وتجي الموجة تجرف احلامنا.. كان عيد، لما كان البياع عالعرباية ينادي عصرونية يا كعك نتحوكم حواليه ونشتري ونقلو كتر الزعترات وبياع الحاملة وملانة عالحمار نركض وراه، ونتفرجا على ماكنة غزل البنات بكل الألوان.. كان عيد،
ولما نشوف البوسطجي عالبسكلة جاي من بعيد ننطر لنشوف اذا جايبلنا شي مكتوب، ولما نسمع صوت المطهر ينادي مطهر مطهر البنات يضحكوا عالصبيان ونركض نطل عليه حامل شنطة عدة الطهور ونحنا خيفانين.. كان عيد،
لما يمرق الحنطور من حد بيتنا نركض نتعمشق عليه ونروح مشوار ببلاش ولما بياع الكاز عالطمبر ينادي عالكاز نركض نعبي ضربة كاز بإبريق التوتيا، كنا نغفل على صوت بابور الكاز وكنا نتحمم بصابون زيت وبالكيلة والطاسة ندلق على حالنا الميّ.. كان عيد،
ولما كنا كل صبح نتخانق دور مين فينا ياخد كاسة الزعتر تا يعمل مناقيش بفرن الحطب، كانت المجدرة أو البصارة مع الفجل والبصل أطيب أكلة وتحلايتنا قشطلية أو مجمرة.. كان عيد، بموسم الجاروفة كل يوم نروح نتفرج ونساعد البحرية بلم السمك عن الشط ونحطو بالإفف ويعطونا كم سمكة نرجع فيهن عالبيت فرحانين ولما نوسخ البيت بجقجقة الميّ والرمل ناكلها أتلي مرتبة.. كان عيد،
لما كنا نكزدر كانت الكزدورة بس عشان نبصبص عالبنات ومن بعيد لبعيد كل واحد منا يحب بنت ويحلم فيها بس بالمنام وعند الغروب نقعد عالصخرات نراقب قرص الشمس بلون حمرة الورد عم يغطس بالبحر ونرجع عالبيوت نحضر عالتلفزيون أبو سليم أو ابو ملحم أو شو شو أو تران تان تا، أو شي مسلسل حسب برنامج الأيام.. كان عيد
كان كل يوم من أيام ماضينا عيد، صارت كل أعيادنا متل باقي الأيام
